МИБнинг хизмати орқали қарз бор ёки йўқлигини текшириш ҳамда қарздорликка тўлов қилиш орқали шу жойни ўзида тақиқни олиб ташлаш мумкин.
“Тошкент” халқаро аэропортида Мажбурий ижро бюросининг хизмат кўрсатиш бўлими ишга тушди. Бу ҳақда компаниянинг матбуот хизмати хабар бермоқда.

Бўлим Ўзбекистон фуқароларининг чет элга чиқишига тақиқ қўйиш билан боғлиқ муаммоли вазиятларнинг ечими билан шуғулланади.
Тошкент халқаро аэропортининг жўнаб кетиш залидаги маълумот столида жойлашган бўлимда МИБ ходимлари 24/7 ишлаши таъкидланган.
Хизмат орқали ходим йўловчининг илтимосига биноан қарз бор ёки йўқлигини айтиши мумкин.

Шунингдек, қарзни тўлаб ва тўлов ҳужжати тақдим этилганидан сўнг МИБ ходими тизимни янгилаши ва йўловчидан кетиш учун тақиқни олиб ташлаши мумкин.

МИБ вакили тўловларни тўғридан-тўғри қабул қилмайди. Айни пайтда йўловчилар фақат электрон тўлов тизимлари (“Click”, “PayMe”, “Apelsin” ва бошқалар) орқали қарздорликларни ёпишлари мумкин.

Яқин кунларда аукционлар якунлангач, Тошкент аэропортида ўз-ўзига хизмат кўрсатиш шохобчалари ўрнатилади ва улар орқали йўловчилар нафақат пластик карталар, балки нақд пулда ҳам тўловларни амалга оширишлари мумкин бўлади.

Манба: Uzbekistan Airports