101

101 - Ёнғин хавфсизлиги хизмати (Ёнғин чиққан ҳолларда ўт ўчириш хизматини тезкор чақиришга қаратилган қисқа рақам).

Ёнғин хавфсизлиги бўйича Ўзбекистон Республикасининг 2009 йил 24 июндаги “Ёнғин хавфсизлиги тўғрисида” ги қонуни қабул қилинган ва ушбу қонун билан ёнғин хавфсизлиги соҳасидаги муносабатлар тартибга солинган.

Унга асосан ёнғинлар тўғрисидаги хабарларни қабул қилиш учун аҳоли пунктларининг телефон тармоқларида ягона рақам — 101 ўрнатилиши белгилаб қўйилган.

Ушбу қисқа рақам, узлуксиз (24/7) равишда фаолият юритади.

102

102 (туристлар учун - 1173) - Ички ишлар органлари (жиноят, ҳуқуқбузарлик ва бошқа ҳодисаларда қўнғироқларни марказлашган тарзда тезкор қабул қилишга қаратилган қисқа рақам).

Ушбу қисқа рақамлар орқали қабул қилинган қўнғироқлар Ички ишлар органларининг вазиятлар марказларидаги автоматлаштирилган ахборот тизимига йўналтирилади. Тизим қўнғироқ қилган абонентни автоматлашган тарзда бўш операторга йўналтиради.

Ушбу қисқа рақам, узлуксиз (24/7) равишда фаолият юритади.

103

103 - Биринчи тиббий ёрдам (Шошилинч тиббий ёрдам кўрсатиш учун шифокорни чақиришга мўлжалланган қисқа рақам).

Ушбу қисқа рақам орқали қабул қилинган қўнғироқлар Республика Тез тиббий ёрдам марказининг “Тез тиббий ёрдам” автоматлаштирилган тизимига йўналтирилади. Бунда, тизим геолокациядан келиб чиққан ҳолда, сўровни қўнғироқ қилувчига энг яқин бўлган тез тиббий ёрдам бригадасига йўналтиради.

104

104 - Газ авария диспетчерлик хизмати (Табиий газ таъминоти юзасидан юзага келган ҳолатлар бўйича қисқа рақам).

Ушбу қисқа рақам, узлуксиз (24/7) равишда фаолият юритади.

1050

1050 - Қутқарув хизмати (Фавқулодда вазиятларда тегишли қутқарув органларини чақиришга қаратилган қисқа рақам).

Шунингдек, “FVV qutqaruvchisi” мобил иловасида ҳам “SOS” хабар юбориш имконияти мавжуд).

Ушбу қисқа рақам, узлуксиз (24/7) равишда фаолият юритади.

Фавқулодда ҳолат деб нимага айтилади?

Фавқулодда ҳолат деб, Ўзбекистон Республикаси фуқароларининг, чет эл фуқароларининг ҳамда фуқаролиги бўлмаган шахсларнинг ҳуқуқ ва эркинликларига, шунингдек юридик шахсларнинг ҳуқуқларига нисбатан ушбу Конституциявий Қонунда назарда тутилган айрим чекловлар белгилашга йўл қўядиган ҳамда уларнинг зиммасига қўшимча мажбуриятлар юклайдиган, Ўзбекистон Республикаси Конституциясига мувофиқ Ўзбекистон Республикасининг бутун ҳудудида ёки айрим жойларида вақтинча жорий қилинадиган давлат бошқаруви органлари, маҳаллий давлат ҳокимияти органлари, фуқароларнинг ўзини ўзи бошқариш органлари, нодавлат нотижорат ташкилотлари ҳамда ташкилий-ҳуқуқий ва мулкчилик шаклидан қатъи назар, бошқа ташкилотлар, уларнинг мансабдор шахслари фаолиятининг алоҳида ҳуқуқий режимига айтилади.

Комендантлик соати деб нимага айтилади?

Комендантлик соати деб, сутканинг махсус берилган рухсатномаларсиз ва шахсни тасдиқловчи ҳужжатларсиз кўчаларда ҳамда бошқа жамоат жойларида ёхуд турар жойдан ташқарида бўлишга тақиқ белгиланган вақтига айтилади.

Фавқулодда ҳолат нима асосида жорий этилади?

Фавқулодда ҳолат Ўзбекистон Республикаси Президентининг фармони билан Ўзбекистон Республикасининг бутун ҳудудида ёки айрим жойларида жорий этилади.

Ўзбекистон Республикаси Президентининг фавқулодда ҳолат жорий этиш тўғрисидаги фармони дарҳол оммавий ахборот воситаларида эълон қилиниши лозим.

Ўзбекистон Республикаси Президентининг фавқулодда ҳолат жорий этиш тўғрисидаги фармони уч сутка ичида Ўзбекистон Республикаси Олий Мажлисининг Қонунчилик палатаси ва Сенатига тасдиқлаш учун киритилади.