Endilikda suvdan maxsus foydalanish yoki suvni maxsus iste'mol qilishga ruxsatnomani Yagona interaktiv davlat xizmatlari portali orqali elektron tarzda olish mumkin.

Bilamizki, suv – hayot manbai. Ayniqsa, buni qurg‘oqchil mintaqada joylashgan davlatlar, jumladan, mamlakatimiz aholisi ham juda yaxshi biladi. 

Suv – inson hayoti uchun zarur bo‘lgan eng muhim tabiiy resurs. U oziq-ovqat mahsulotlarini yetishtirish, energiya va sanoat mahsulotlarini ishlab chiqarish, odamlarning maishiy va sanitar-gigienik ehtiyojlarini qondirish kabi jarayonlarda tengsizdir.

Yer sharidagi barcha suv zaxirasining 97,2% okeanlarda jamlangan. Biroq uning tarkibi o‘ta sho‘rligi uchun iste'molga yaroqsiz hisoblanadi. Suv zaxirasining 2,2% esa yer yuzi va tog‘liklarni qoplagan muzliklardagi chuchuk suvlar hissasiga to‘g‘ri keladi. Shunday ekan, tabiatning ushbu qimmatli resursini tejashimiz, asrab-avaylashimiz darkor. Buning uchun esa nazorat va tartib juda muhim.

Huquqiy hujjatga ko‘ra, ushbu ruxsatnoma suvdan maxsus foydalanish yoki suvni maxsus iste'mol qilishni, shu jumladan, suvni olishni va oqova suvlarni oqizib yuborishni amalga oshiruvchi jismoniy va yuridik shaxslarga tatbiq qilinadi. 

Jismoniy shaxslarning kommunal suv quvurlari va kanalizasiyaning markazlashtirilgan tarmoqlaridan sutkasiga 5 m3gacha suvdan umumiy foydalanishida esa tatbiq etilmaydi.

Ruxsatnoma olmasdan suvdan maxsus foydalanish yoki suvni maxsus iste'mol qilish taqiqlanadi.

Avvallari bu turdagi ruxsatnomalarni olish uchun tegishli tashkilotlarga bir qancha hujjatlar bilan qayta-qayta murojaat etilardi. Hozirgi kunda elektron hukumat tufayli idoralararo o‘zaro bog‘lanish va kelishish elektron tarzda yo‘lga qo‘yilgan.