Yangi yilga ham sanoqli kunlar qoldi. Oxirlab borayotgan 2021 yilda Elektron hukumat loyihalarini boshqarish markazi mutaxassislari Google orqali o‘zbekistonliklarning axborot texnologiyalari va elektron hukumatga oid qidiruv so‘rovlari tahlilini o‘tkazishga qaror qilishdi. Bunda Google Trends xizmatidan foydalanildi.

Tahlil natijalariga ko‘ra, O‘zbekistonda 2021 yilning eng ommabop platformasi – kundalik.com sayti bo‘ldi (maktabdagi ish jarayonini avtomatlashtirish bo‘yicha o‘quv platformasi). Google uni “Eng ommabop” so‘rov deb topgan. Ya’ni bu yilgi so‘rovlar o‘tgan yilga nisbatan 5000% o‘sish borligini ko‘rsatgan.

“Supermashhurlik” belgisi bilan 2-o‘ringa “Emlash.uz” – O‘zbekiston Sog‘liqni saqlash vazirligining emlash portali ko‘tarilgan.

Keyin o‘ringa chiqqan dolzarb so‘rov – abituriyentlarning OTMlarga kirish uchun arizalar topshirish va Davlat test markazining imtihon natijalarini olish xizmati bo‘yicha yuborilgan.

Onlinedu.uz va Uzbekkoders.uz ta’lim platformalari esa so‘rovlar soni bo‘yicha 4- va 5-o‘rinlarga to‘g‘ri kelgan.

Shunisi e’tiborga molikki, «Qonunchilik va hukumat» toifalarida my.gov.uz, ya’ni Yagona interaktiv davlat xizmatlari portali (YIDXP)ga kirish va arizalarni tekshirish bo‘yicha so‘rovlar ham yaxshigina ommalashgan.