Эслатма! 1 январдан аҳолидан талаб қилинмайдиган маълумот ва ҳужжатлар рўйхати

2022 йил 1 январдан бошлаб давлат органлари, хўжалик бирлашмалари, маҳаллий ижро этувчи ҳокимият органлари ва давлат ташкилотларининг аҳоли, шу жумладан, тадбиркорлик субъектларидан қуйидаги маълумот ва ҳужжатларни сўраши бекор қилинади:

▪️тадбиркорлик субъекти давлат рўйхатидан ўтказилганлиги тўғрисидаги гувоҳнома маълумотлари;
▪️лицензия, рухсат этиш хусусиятига эга ҳужжатлар ва хабарномалар қабул қилинганлиги тўғрисида тасдиқнома мавжудлиги;
▪️ давлат божи, йиғимлар ва бошқа тўловлар тўланганлиги;
▪️қимматли қоғозларга эгалиги, қимматли қоғозлар билан операциялар амалга оширилганлиги, дивидендлар олинганлиги;
▪️кам таъминланган оила ёки оила аъзоси сифатида рўйхатга олинганлиги;
▪️жисмоний шахслар томонидан алиментлар тўланганлиги ва олинганлиги;
▪️олий маълумот тўғрисидаги диплом маълумотлари;
▪️жисмоний шахс томонидан ўрта махсус, профессионал (касб-ҳунар) таълим муассасаси тугатилганлиги;
▪️жисмоний шахс томонидан умумий ўрта таълим муассасаси (11-синф негизида) тугатилганлиги;
▪️фуқаро «Ёшлар дафтари» ёки «Аёллар дафтари»да мавжудлиги;
▪️ ўзини ўзи банд қилган шахслар тўғрисида маълумотлар;
▪️олий таълим муассасаларига ўқишга кириш учун имтиёзга эга бўлган абитуриентларнинг имтиёз ҳуқуқини тасдиқловчи ҳужжат тўғрисида маълумотлар;
▪️молиявий ҳисоботлар нусхалари;
▪️жисмоний шахсларнинг охирги 12 ойдаги иш ҳақини тасдиқловчи маълумотномалар;
▪️ижтимоий нафақа ва пенсиялар тўланганлиги тўғрисидаги маълумотномалар.

Бунда, давлат органи ва ташкилотлари жисмоний шахсларга давлат хизматларини кўрсатиш, ишга қабул қилиш жараёни ва бошқа маъмурий тартиб-таомилларни амалга оширишда рўйхатда келтирилган ҳужжат ва маълумотларни Ўзбекистон Республикаси Президентининг 2021 йил 24 июлдаги ПФ-6269-сон Фармонинг 4-иловасида белгиланган масъул давлат органлари ва ташкилотларидан мустақил равишда – «Электрон ҳукумат» тизими идоралараро интеграциялашув платформаси орқали сўраб олади.

Ҳозирги кунда Ахборот технологиялари ва коммуникацияларини ривожлантириш вазирлиги ахборот хавфсизлиги талабларига риоя этган ҳолда вазирлик ва идоралар билан биргаликда 2022 йил 1 январга қадар идоравий ахборот тизимлари, ресурслари ва маълумотлар базаларида мавжуд бўлган ахборот ва маълумотларнинг «Электрон ҳукумат» тизими идоралараро интеграциялашув платформасига интеграция қилиш ишларини олиб бормоқда.