Umra safariga otlangan bir yurtdoshimiz hamma hujjatlarini to‘g‘rilab, qo‘liga biletini oldim deganida, uning nomiga “yo‘q joydan” katta qarzdorlik chiqib kelibdi. Aniqlashtirsa, bu qachonlardir unga tegishli bo‘lgan, biroq yangi egasi o‘z nomiga to‘liq rasmiylashtirmagan xizmat inshootining yillar davomida to‘planib qolgan to‘lovlari ekan...

Agar bilsangiz, ijro hujjati bo‘yicha qarzdorlik yuzaga kelib, qarzdorga nisbatan ijro ishi qo‘zg‘atilsa, sud tomonidan uning chet elga chiqishi taqiqlanishi yoki mol-mulki xatlanishi mumkin. Ya’ni qarzdor muammoni tezroq hal qilmasa, chet elga chiqolmaydi.

Bu kabi ko‘ngilsiz vaziyatlarning oldini olish uchun my.gov.uz da “Ijro hujjati bo‘yicha qarzdorlikni tekshirish” xizmati joriy etilgan.

Majburiy ijro byurosiga o‘tkazilgan qarzdorlik mavjud yoki yo‘qligi haqida oldindan xabardor bo‘lish, siz tomoningizdan noto‘g‘ri deb topilgan qarzdorlik haqida batafsil ma’lumot olish hamda mas’ul ijrochilar bilan bog‘lanib, xatolikni bartaraf etish uchun xizmatdan foydalanib ko‘ring.

Buning uchun sizdan hech qanday ma’lumot ham, xarajat ham talab etilmaydi.

Batafsil ma’lumot bilan quyidagi videoyo‘riqnoma orqali tanishing: https://youtu.be/G2JtvgVs60k