Бугун нафақат шаҳар маркази, балки чекка қишлоқлардаги юртдошларимиз ҳам электрон давлат хизматларидан my.gov.uz портали орқали онлайн фойдаланишлари мумкин.

Бунинг учун уйимизда интернетга уланган компьютер ва ноутбук ёки ёнимизда қўл телефонимиз бўлса кифоя.

Масалан, ҳозирги кунда оилалар давлат ташкилотларига бормасдан “Ижтимоий ҳимоя ягона реестри” га кириш учун ариза бериши ёки ҳисобланган иш ҳақи тўғрисида маълумотнома олиши мумкин.

Ҳатто пенсионерлар ва ногиронлар уйидан чиқмай туриб, санаторийларда даволаниш учун йўлланмалар олиш имкониятига эга.

Ҳайдовчилар автомобил транспортида йўловчилар ва юкларни ташишга лицензия олиш, автотранспорт бошқаруви учун электрон ишончнома бериш каби хизматлардан фойдалансалар бўлади.

Оналар учун болани боғчага навбатга қўйиш ва навбатни текшириб бориш қулайлиги яратилган.

Турмуш қурадиган ёшлар кераксиз ҳужжатларга ортиқча вақт сарфламай, никоҳдан ўтишга онлайн ариза топширишлари ва ФҲДЁга фақат тўйдан олдин боришлари мумкин.

My.gov.uz да жорий этилган 400 дан зиёд электрон давлат хизматларидан онлайн фойдаланинг. Вақтингиз ва нақдингизни тежанг!