Судланмаганлик (ёки судланганлик) тўғрисида маълумотнома олиш тартиби

2021-02-03 11:00:00

Жисмоний шахсларга кўрсатилувчи ушбу хизмат тури бугун анча соддалаштирилган. Қуйида маълумотнома олиш тартиби билан батафсил танишасиз. 

Ёдингизда бўлсин, мазкур хизмат турида яримавтоматик ЭРИ талаб қилинади.

Бу қандай ишлайди?

Ариза берувчи Давлат хизматлари марказига ўзи келиб мурожаат этади ва унинг аризаси ходимлар томонидан тўлдириб берилади. Электрон тарзда фойдаланиш учун Ягона интерактив давлат хизматлари портали (ЯИДХП)да сўровнома мустақил тўлдирилиб, рўйхатдан ўтилади.

Учинчи шахслар манфаати учун ҳаракат қилаётганда нотариал тасдиқланган ишончнома илова қилинади. Учинчи шахс манфаати учун шартнома (ордер) асосида адвокатлар томонидан мурожаат қилинганда нотариал тасдиқланган ишончнома талаб этилмайди.

Сўровнома тўлдирилгач ариза берувчи маълумотларнинг тўғрилигини текшириб, уни ўз ЭРИси билан тасдиқлайди ва ДХМ ходими аризани ваколатли органга электрон тарзда юборади.

Ваколатли орган сўровнома келиб тушган кундан бошлаб 2 иш куни мобайнида QR-код қўйилган маълумотномани расмийлаштиради ҳамда уни ўз ЭРИси билан тасдиқлаб, тегишли Давлат хизматлари марказига ёки аризачига ЯИДХП орқали электрон равишда юборади.

ДХМ маълумотнома келиб тушгач аризачи талабига кўра, унга ўз муҳрини қўйган ҳолда тақдим этиши мумкин.

Хизматдан фойдаланиш учун ушбу ҳаволага ўтинг:  https://my.gov.uz/uz/service/135