Бино ва иншоотнинг ташқи кўринишини ўзгартиришни келишиш

Аҳамият берсангиз, бугун ҳар қадамда қурилиш, бунёдкорлик ишларига дуч келамиз. Қурилишнинг ўзи катта бир жараён бўлиб, унга доир ҳужжатларни қонунчилик талабларига мослаштириш ҳам озми-кўпми вақтимизни олади. 

Режамизга тўғри келадиган дам олиш кунлари эса давлат ташкилотлари ишламайди. Яна айни кунлардаги жазирамада одамнинг муздеккина уй ёки ишхонадан чиққиси ҳам келмайди. 

Бундай вазиятда энг тўғри танлов Ягона порталдир. Яна бонусига 10 фоиз чегирма берилишига нима дейсиз?! 

Айтайлик, магистрал кўчалар (аҳоли пунктлари доирасидаги), халқаро ҳамда давлат аҳамиятига эга автомобиль йўллари бўйида бино ёки иншоотингиз бор ва сиз унинг ташқи кўринишини ўзгартирмоқчисиз. 

Эндиликда “Бино ва иншоотнинг ташқи кўринишини ўзгартиришни келишиш” хизматини ҳам электрон тарзда олиш мумкин. 

Бунинг учун Ягона портал (my.gov.uz)да рўйхатдан ўтиб, тегишли сўровномани тўлдирасиз. 

Эслатиб ўтамиз, хизматдан фойдаланиш учун бино ва иншоот фасадининг электрон кўринишдаги эскиз лойиҳаси илова қилиниши ҳамда сўровнома электрон рақамли имзо билан тасдиқланиши лозим.