Oliy ta’limga o‘qishga kirish, talaba bo‘lish — har bir yoshning orzusi. Lekin ko‘p hollarda moliyaviy to‘siqlar uni cheklab turadi. Ammo endi bu muammoni oson hal qilish mumkin, ya’ni ta’lim krediti orqali.

Ta’lim krediti nima?

Ta’lim krediti – bu davlat, nodavlat va xorijiy oliy ta’lim muassasalarida shartnoma asosida o‘qiyotgan talabalarga beriladigan imtiyozli kreditdir. U sizga shartnoma pulingizni to‘lashga yordam beradi.

Ta’lim krediti kimlarga beriladi?

Ta’lim krediti kunduzgi ta’lim shaklida, bakalavr va magistratura bosqichida o‘qiyotgan talabalarga beriladi. Bu imkoniyatdan o‘qishini ko‘chirgan talabalar ham foydalanishi mumkin.

Muhim sharti shuki, kredit 1-bosqich talabalariga bir yillik shartnoma miqdorigacha ajratiladi. 2-bosqich va undan yuqori kurs talabalari esa o‘zlashtirish ko‘rsatkichi "3" dan past bo‘lsa, kontrakt summasining 80 foizigacha kredit olishlari mumkin.

Ta’lim kreditini qaytarish ham ancha oson va erkin. Uni o‘qish muddati tugaganidan so‘ng, yettinchi oydan boshlab, 7-yil davomida qaytarsangiz bo‘ladi. O‘g‘il bolalar uchun foizlar Markaziy bankning asosiy stavkasidan kelib chiqib belgilanadi, qizlarga esa foizsiz kredit ajratiladi. Ta’lim krediti super-kontraktda o‘qiydiganlar, sirtqi, kechki yoki masofaviy ta’lim shaklidagi talabalarga berilmaydi. Shuningdek, xorijdagi Oliy ta’lim muassasalarida o‘qiyotganlar ham ta’lim kreditini ololmaydi. Kredit olish uchun kafillik kerak bo‘ladi. Lekin ijtimoiy himoya reestriga kiritilgan oilalar farzandlariga kafillik talab etilmaydi.

Ta’lim krediti uchun arizani onlayn tarzda my.gov.uz portali hamda talim-krediti.mf.uz axborot tizimi orqali yuborishingiz mumkin. Arizangiz 5 ish kunida ko‘rib chiqiladi.

Oliy ta'lim