Пенсия ҳисобварағингизга қанча маблағ йиғилганини билишни истайсизми?

2005 йилдан кучга кирган Ўзбекистон Республикасининг “Фуқароларнинг жамғариб бориладиган пенсия таъминоти тўғрисида”ги Қонунидан ҳанузгача бехабарлар кўп. 

Аксарият кишилар шахсий жамғариб бориладиган пенсия ҳисобварағидаги маблағни нафақага чиққанида ҳар ой оладиган пенсия пули билан адаштиришади. 

Бу ҳақида маълумотга эга бўлганлар эса ҳисобварағига қанча маблағ йиғилганини билиш учун банкка тез-тез қатнаб туришади. 

Ахир, бу нафақага чиққанда йиллар давомида тўпланиб турган маблағни (ҳар ойлик пенсиядан ташқари) бир маротаба улгуржи ёки бўлиб-бўлиб олиш имконияти-ку. 

Бунга сиз ҳам қизиқиб қолдингизми? Ёки аллақачон банкка қатнаб, навбат кутишдан чарчагансизми?

Демак, бехабарсиз. Ягона порталда яратилган қулайликдан фойдаланмагансиз? 

Чунки my.gov.uz манзилида нафақат “Шахсий жамғариб бориладиган пенсия ҳисобварағи ҳолати ҳақида маълумот”га эга бўлиш, балки тегишли маълумотномани тез ва осон юклаб олиш имконияти ҳам бор.

Маълумот ўрнида: дуч келинган муаммо ва хатоликлар юзасидан Халқ банкининг (71) 210-20-02 ёки 1106 ишонч рақамларига 24 соат давомида мурожаат қилишингиз мумкин.