101

101 - Yong‘in xavfsizligi xizmati (Yong‘in chiqqan hollarda o‘t o‘chirish xizmatini tezkor chaqirishga qaratilgan qisqa raqam).

Yong‘in xavfsizligi bo‘yicha O‘zbekiston Respublikasining 2009-yil  24-iyundagi “Yong‘in xavfsizligi to‘g‘risida” gi qonuni qabul qilingan va ushbu qonun bilan yong‘in xavfsizligi sohasidagi munosabatlar tartibga solingan.

Shuningdek, unga asosan yong‘inlar to‘g‘risidagi xabarlarni qabul qilish uchun aholi punktlarining telefon tarmoqlarida yagona raqam - 101 o‘rnatilishi belgilab qo‘yilgan.

Ushbu qisqa raqam, uzluksiz (24/7) ravishda faoliyat yuritadi.

102

102 (turistlar uchun - 1173) - Ichki ishlar organlari (jinoyat, huquqbuzarlik va boshqa hodisalarda qo‘ng‘iroqlarni markazlashgan tarzda tezkor qabul qilishga qaratilgan qisqa raqam).

Ushbu qisqa raqamlar orqali qabul qilingan qo‘ng‘iroqlar Ichki ishlar organlarining vaziyatlar markazlaridagi avtomatlashtirilgan axborot tizimiga yo‘naltiriladi. Tizim qo‘ng‘iroq qilgan abonentni avtomatlashgan tarzda bo‘sh operatorga yo‘naltiradi.

Ushbu qisqa raqam, uzluksiz (24/7) ravishda faoliyat yuritadi.

103

103 - Birinchi tibbiy yordam (Shoshilinch tibbiy yordam ko‘rsatish uchun shifokorni chaqirishga mo‘ljallangan qisqa raqam).

Ushbu qisqa raqam orqali qabul qilingan qo‘ng‘iroqlar Respublika Tez tibbiy yordam markazining “Tez tibbiy yordam” avtomatlashtirilgan tizimiga yo‘naltiriladi. Bunda, tizim geolokatsiyadan kelib chiqqan holda, so‘rovni qo‘ng‘iroq qiluvchiga eng yaqin bo‘lgan tez tibbiy yordam brigadasiga yo‘naltiradi.

Ushbu qisqa raqam, uzluksiz (24/7) ravishda faoliyat yuritadi.

104

104 - Gaz avariya dispetcherlik xizmati (Tabiiy gaz ta’minoti yuzasidan yuzaga kelgan holatlar bo‘yicha qisqa raqam).

Ushbu qisqa raqam, uzluksiz (24/7) ravishda faoliyat yuritadi.

1050

1050 - Qutqaruv xizmati (Favqulodda vaziyatlarda tegishli qutqaruv organlarini chaqirishga qaratilgan qisqa raqam).

Shuningdek, “FVV qutqaruvchisi” mobil ilovasida ham “SOS” xabar yuborish imkoniyati mavjud).

Ushbu qisqa raqam, uzluksiz (24/7) ravishda faoliyat yuritadi.

Favqulodda holat deb nimaga aytiladi?

Favqulodda holat deb, Oʻzbekiston Respublikasi fuqarolarining, chet el fuqarolarining hamda fuqaroligi boʻlmagan shaxslarning huquq va erkinliklariga, shuningdek yuridik shaxslarning huquqlariga nisbatan ushbu Konstitutsiyaviy Qonunda nazarda tutilgan ayrim cheklovlar belgilashga yoʻl qoʻyadigan hamda ularning zimmasiga qoʻshimcha majburiyatlar yuklaydigan, Oʻzbekiston Respublikasi Konstitutsiyasiga muvofiq Oʻzbekiston Respublikasining butun hududida yoki ayrim joylarida vaqtincha joriy qilinadigan davlat boshqaruvi organlari, mahalliy davlat hokimiyati organlari, fuqarolarning oʻzini oʻzi boshqarish organlari, nodavlat notijorat tashkilotlari hamda tashkiliy-huquqiy va mulkchilik shaklidan qatʼi nazar, boshqa tashkilotlar, ularning mansabdor shaxslari faoliyatining alohida huquqiy rejimiga aytiladi.

Komendantlik soati deb nimaga aytiladi?

Komendantlik soati deb, sutkaning maxsus berilgan ruxsatnomalarsiz va shaxsni tasdiqlovchi hujjatlarsiz koʻchalarda hamda boshqa jamoat joylarida yoxud turar joydan tashqarida boʻlishga taqiq belgilangan vaqtiga aytiladi.

Favqulodda holat nima asosida joriy etiladi?

Favqulodda holat Oʻzbekiston Respublikasi Prezidentining farmoni bilan Oʻzbekiston Respublikasining butun hududida yoki ayrim joylarida joriy etiladi.

Oʻzbekiston Respublikasi Prezidentining favqulodda holat joriy etish toʻgʻrisidagi farmoni darhol ommaviy axborot vositalarida eʼlon qilinishi lozim.

Oʻzbekiston Respublikasi Prezidentining favqulodda holat joriy etish toʻgʻrisidagi farmoni uch sutka ichida Oʻzbekiston Respublikasi Oliy Majlisining Qonunchilik palatasi va Senatiga tasdiqlash uchun kiritiladi.