Vaqti keldi. Tezkor o‘rganishimiz va ko‘nikishimiz shart

Zamonaviy dunyoda eng qimmatli resurs vaqt hisoblanadi. Kuzatgan bo‘lsangiz, hozirgi kunda odamlar uchun har bir soniya qadrli. Axir, vaqt tejami kunlik rejalarni bitirishimizda juda muhim. Shuning uchun ham bugun elektron ko‘rinishdagi davlat xizmatlari aholimiz orasida ancha ommalashib qoldi. 

Ayniqsa, “Elektron bog‘cha” ko‘pchilikka ma’qul kelgan. Ya’ni bolani davlat maktabgacha ta’lim tashkilotiga rasmiylashtirish Yagona portal (YaIDXP) yoki DXM orqali amalga oshirib kelinmoqda.

Nihoyat biz ham mahalla, ishxonadan ma’lumotnoma va boshqa hujjatlarni to‘plab, tuman (shahar) xalq ta’limi bo‘limlari huzuridagi qabul komissiyalari eshigini qoqib yurmayapmiz. Yoki bog‘cha mudiri bilan «kelishib», ishni bitirib ketmayapmiz.Chunki endi ularda bunday vakolat yo‘q. 

Bundan buyon davlat xizmatlari bosqichma-bosqich elektron ko‘rinishga o‘tkazilib boraveradi. Interaktiv xizmatlardan foydalanish ko‘nikmasiga ega bo‘lib olsangiz, o‘zingizga yaxshi, kelgusida vaqtdan va ortiqcha xarajatlardan yutasiz. Korrupsiya va byurokratik to‘siqlarga duch kelmaysiz.

Demak, vaqti keldi. Tezkor o‘rganishimiz va ko‘nikishimiz shart.